Debabarrenako herri guztietan elikagai bilketa egingo da hurrengo asteetan, Lesboseko errefuxiatuen kanpalekuetara bidaltzeko. Herri bakoitzean elikagai mota ezberdin bat jasoko da, eta ondoren Lesbosera bidaliko da kanpalekuetan janaria prestatzeko. Gaur egun, ZAPOREAK sukaldean 3.000 otordu prestatzen dira egunero.
Elgoibarren, martxoaren 24tik (astelehena) martxoaren 28ra (ostirala), Garbantzu Pedrosillanoa bilduko da. Bilketa merkatu plazan egingo da astelehenetik ostiralera, 10:00etatik 13:00etara eta 17:00etatik 20:00etara. Gainera, garbantzuak erosi eta lagatzeko aukera egongo da honako establezimendu hauetan: Santa Anako Eroskin, Marrubi fruta-dendan eta Txillarre denda ekologikoan.
Bestalde, ZAPOREAK-en aldeko errifak salgai daude Elgoibarko hainbat denda eta tabernatan, besteak beste: Darama denda-tailerra, Marrubi fruta-denda, Armueta harategia, Alire estetika zentroa, Txillarre denda ekologikoa eta Tantaka taberna. Errifa bakoitzak 1 euroko prezioa du eta zozketa martxoaren 29an egingo da, Ermuko Orbe Kardenal plazan burutuko den “Tupper Solidarioa” ekimen solidarioarekin batera.
Herritar guztiak animatzen ditugu ekimen solidario honetan parte hartzera, Lesbosen dauden errefuxiatuak laguntzeko.