Atzo, martxoak 9, hil zen Luciano (Lucio Ruiz Poveda) artista elgoibartarra, 93 urte zituela. Azken lanak Elgoibarren erakutsi zituen 2024ko apirilaren 12an
Lucio Ruiz-Poveda (Luziano) Elgoibarren jaio zen 1931n. Haurra zelarik, anai-arrebekin batera itsasoratu zen Habana ontzian, 1937ko udaberrian, Gerra Zibilean haur talde handienak kanporatu zituztenean. Frantziara joan zen, eta han, Pariseko familia batek hartu zuen. Familia hark eragin handia izan zuen berarengan. Elgoibarrera itzulitakoan, pintatzeko nahia adierazi zuen, eta Arte eta Ofizioen Eskolan hartzen zituen marrazketa klaseak uztartu zituen lehenengo erretratuekin.
Ezkonberritan, Madrilera joan zen, eta han grafista lanak egin zituen Gran Vian zeuden zine-aretoetarako filmen karteltzarrak eginez. Gerora, Madrileko gau giroko erretratuak egin zituen. Handik gutxira, Parisera joan zen eta margolari bihurtu zen. Denboraldi luzeak igaro zituen Montmartren, eta harremanak egin zituen beste artista batzuekin.
Hainbat erakusketa egin ostean, 1962an, arte galeria propioa ireki zuen Madrileko Castellana Hilton hotelean. Bertan ostatu hartzen zuten, besteak beste, Espainiara errodatzera etortzen ziren aktoreetako askok. Horri esker pertsonaia ospetsuen erretratuak egin ahal izan zituen, Omar Sharif-enak edo Stphen Boyd-enak. Geroago, Madrileko Meliá Princesa hotelean ere galeria ireki zuen, eta, 1971n beste galeria bat ireki zuen Zarautzen. Oso jarduera artistiko garrantzitsua egin zuen bertan, baina, osasun arrazoiak tarteko, itxi egin zuen 2017an. 1976an, Claudio Coello kalean ireki zuen azken galeria.
Ipar Ameriketako arte merkatari bati esker, erakusketa bat egin zuen New York-en, eta urte batzuk aurrerago, esperientzia hori errepikatu zuen Texaseko, Oklahomako eta Mexikoko hainbat aretotan. Ugariak dira bere ibilbidearen baitan egin dituen banakako erakusketak eta kolektiboak, eta lehiaketa eta sariketa askotarako ere aukeratu izan dute. Luzianoren lanak ikusgai daude museoen eta erakundeen bildumetan: Madrileko Arte Ederren Zirkulua, Kutxa eta beste banku-erakunde batzuk, Pandhale Plains museoa (Texas), Kultura eta Defentsa ministerioak, e.a.; baita Espainiako, Frantziako, Estatu Batuetako, Indiako, Japoniako, Hegoafrikako eta beste herrialde batzuetako bilduma pribatu garrantzitsuak.
Luzianoren jarduera artistikoan garrantzia handia izan du paisaiak eta leku interesgarriak bilatzeko izan duen nahiak. Horrek Espainia osoan barrena bidaiatzera eraman zuen, bere margo lanetarako bereziak ziren herriak edo beste herrialde batzuetako pertsona bereziak aurkitzeko. Hala, Frantzian, Marokon, Italian, Nepalen, Turkian e.a. ibili zen, turismoa gaur egun bezain zabaldurik ez zegoen garai batean. Bidaia horiek berebizikoak izan ziren bere margolanentzat. Bere lanetan paisaiak eta erretratuak nagusitzen dira, baina, beti, oso materikoa eta kolorista den asmo estetiko batez. Hala ere, artistaren azken etapan, bizitzaren eta artearen bilakaera logikoaren ondorio gisa, alde batera utzia du erreferente errealista, eta materiari eta koloreari bakarrik eusten dio.
Informazio gehiago: https://lucioruizpovedaluziano.blogspot.com/p/obra.html?m=0