Elgoibarko Udalak herriko tabernetako terrazen ordenantza berritzeko proposamena aurkeztu du, COVID-19aren ondorioz sortutako errealitate berrira egokitzeko eta erabilera orekatuagoa bermatzeko.
Azken urteetan, terraza gune berriak sortu dira eta erabiltzaileek ohitura berriak sortu dituzte. Hori dela eta, udalerriko behar berriei erantzuteko, ordenantzan hainbat aldaketa proposatu dira:
- Terrazen espazioen berrantolaketa eta babesgune berrien sorrera.
- Tasak berriz definitzea, metro karratuko prezioa kenduz eta erabilitako elementuen arabera ordainketa ezartzea.
Auzoetako tabernei %15eko hobaria aplikatzea, bertako bizitza soziala sustatzeko.
- Garbitasuna eta irisgarritasuna bermatzea, terrazako elementuak taberna itxita dagoenean kalean ez uzteko neurriak bultzatuz (horretarako, %50eko hobaria eskainiko zaie terrazak jasotzen dituztenei).
Proposamen honen helburua herri atsegin eta bizia sortzea da, terrazek sortzen duten onura balioan jarriz eta aldi berean herritarrentzako espazio egokiak bultzatuz. Honekin, espazioen banaketa bidezko eta orekatu bat bilatzen da.
Helburua herritarren onura izanik, hobari sistema proposatzen da hau bultzatzeko, ordenantza berria era egokienean betetzen duten tabernariei hobariak eskainiko zaizkielarik. Beraz, orain arteko zerga berdina mantenduko da, herriko txukuntasunean laguntzen duten tabernariek gutxiago ordainduko dutelarik.
Ordenantza hau hilabetetako lanketaren emaitza da, herritarrekin, ostalariekin eta udal teknikarien iritziak bilduz.
Atzo ospatu zen Udaleko Lurralde Batzordean, gobernu taldeak gaia azaldu zion oposizioko alderdiari beraien iradokizunak proposatu ahal ditzaten.
Bestalde, udal gobernu taldeak tabernariei eskerrak eman nahi dizkie prozesu honetan izandako inplikazioagatik.
Ordenantzaren lanketak jarraipena izango du, eta hurrengo hilabeteetan borobiltzen joango da.