Elgoibarko Udaleko Kultura Sailak 2025ean udalerrian kultura eta arte sorkuntza sustatzeko laguntzen deialdia ireki du. Dirulaguntza hauek sormen-proiektu berritzaileak bultzatzeko helburua dute, literaturan, antzerkian, zineman, musikan, dantzan eta arte plastikoetan, besteak beste.
Laguntza hauek eskuratzeko, norbanakoek zein taldeek eskaera egin ahal izango dute, betiere Elgoibarren erroldatuta badaude edo bertan jaiotakoak badira.
Eskaerak 2025eko apirilaren 30era arte aurkeztu ahal izango dira Udalaren webgunearen bidez. Proiektuen balorazioa hainbat irizpideren arabera egingo da, hala nola kalitate artistikoa, bideragarritasun ekonomikoa, euskararen sustapena eta genero-ikuspegiaren txertaketa.
Guztira 7.000 euroko aurrekontua duen ekimen honek Elgoibarko Udalaren konpromisoa indartzen du, bertako talentua sustatzeko eta udalerriko kultura dinamizatzeko.
Deialdiari, eskakizunei eta beharrezko dokumentazioari buruzko informazio gehiago eskuratzeko, interesdunek Elgoibarko Udalaren webgunea kontsultatu edo Kultura Sailarekin harremanetan jarri daitezke.