2024an Ludotekak eta Atxutxiamaikak udaberriko eta neguko oporraldietako eskaintza banatzeko erabakia hartu zuten ( ordurarte oporraldietan eskaintza bakarra egiten zuten, elkarlanean). Helburu komunak partekatu arren, egitasmo bakoitzak bere izaera du eta haurrekin esku-hartzeak modu berezituan garatzen dira. Era berean, aurten, uda ere banatuta egitea proposatzen da, baita oporraldi guztietan adin banaketa egitea ere. Ondorioz, Atxutxiamaikak haur hezkuntzako haurrei zuzenduko die eskaintza eta Ludotekak, aldiz, Lehen Hezkuntzako ikasleei.
Hauek dira erabaki hartzeko kontuan hartu diren arrazoiak:
- Lehen Hezkuntzakoentzako eskaintza herrian zabalagoa da haur hezkuntzakoena baino (Kirol Kanpusa, Ludoteka etab.) horregatik, baliabideak optimizatuz, eskaintzak orekatzea bilatu nahi da.
- Adin banaketarekin, Ludotekako erabiltzaile diren haurrek, udako eskaintzan ere, Ludotekako hezitzaileak beraien erreferente izateko aukera izango dute.
- Guztira plaza gehiago eskaini ahal izango dira, bai haur hezkuntzako haurrentzat, bai lehen hezkuntzakoentzat.
- Ludotekako eskaintzaren kuotak merketu ahal izango dira.
- Atxutxiamaikak haur hezkuntzako haurrei eta beren familiei zuzendutako eskaintza zabalagoa eta pluralagoa egin ahal izango du.
Aldaketa honen ondorioz, joan den urtean LH1-3koentzako udaberriko eskaintzan Atxutxiamaikak eguneroko eskaintza txoko formatuan goizez eskaini bazuen ere, aurten ez da hala izango, Ludotekak prestatu duen eskaintza beste modu batekoa izango delako. Familiei kontziliazioarekin laguntzeko asmoz, Udalak zaintza zerbitzua jarriko du Ludotekan, eskaintza honen osagarri. Ludoteka zerbitzua kudeatzen duen Zehar, Heziketa eta Zerbitzuak elkarteak eskainiko du zerbitzua, apirilaren 22tik 25era, 09:00etatik 13:00etara. Izena eman beharko da galdetegia beteta martxoaren 14a baino lehen eta 20 euro ordaindu beharko da Ludotekan.
Era berean, udaldiari begira, Udal Ludotekak LH1-3ko haurrentzako eguneroko eskaintza eta zaintza zerbitzua eskaintzea aurreikusita dago.
Azpimarratu, haurren sustapeneko helburuetan oinarritutako eskaintza hezitzailea dela oporraldietakoa. Haurra erdigunean jarriz diseinatutako da, hauen beharretara egokitua, zerbitzu eskuragarriagoa bermatzeko helburuarekin planifikatutakoa, beti ere familien kontziliazioa kontutan hartuta.
NORENTZAT: LH1- LH2- LH3
ORDUTEGIA: 9:00/9:30 – 12:30/13:00
IZEN EMATE EPEA: MARTXOAREN 14ra arte
KUOTA: 20€
ORDAINKETA: MARTXOAK 18/19 (9:30-11:30/15:00-16:30) LUDOTEKAN
HARREMANETARAKO KONTAKTUA: 656 740 793 / ludotekaelgoibar@gmail.com