Elgoibarko Udala Irisgarritasun Unibertsaleko Plan Integrala (PIAU) berrikusten eta eguneratzen ari da, udalerriaren hiri-inguruneko, garraio publikoko eta eraikin publikoetako irisgarritasun baldintzak hobetu asmoz. Egungo plana 2018koa da, eta berrikuspen-prozesuaren barruan, ekainaren 19an (osteguna), arratsaldeko 18:00etan, Kalebarren plazako Kultur Etxeko hitzaldi aretoan partaidetza tailer bat antolatu da.
Prozesuaren lehen fasean herritarrei zuzendutako inkesta publiko bat egin zen. Orain, jasotako ekarpenen emaitzak partekatu eta ondorio nagusiak parte-hartzaileekin kontrastatzeko unea da. Tailer honek datorren 8 urteetarako lehentasunak definitzen lagunduko du.
PIAU berriak irisgarritasuna ikuspegi integratutik aztertuko du: ez soilik espazio fisikoetan, baita informazio- eta komunikazio-kanaletan ere, Elgoibarko Udalaren mendeko zerbitzu eta arlo guztietan. Tailerra irekia da eta interesa duen edozein pertsonak parte har dezake.