Elgoibarko Udalak, aho batez, alderdi politiko guztien aldeko botoarekin, onartu du M8ko adierazpen instituzionala.
2025eko MARTXOAREN 8KO ELGOIBARKO UDALEKO ADIERAZPENA
Beijingo Adierazpenaren eta Ekintza Plataformaren 30. urteurrena; hiru hamarkada berdintasunaren bidean.
Gaur, 2025eko martxoaren 8a, Emakumeen Nazioarteko Eguna dela eta, Beijingo Adierazpena eta Ekintza Plataforma adopzioaren 30. urteurreneko ospakizunarekin bat egin nahi dugu. 1995ean Beijingen egin zen Emakumeari buruzko IV. Mundu Konferentzian adostutako akordioek genero-berdintasuna, emakume eta neska guztien ahalduntzea eta giza eskubideak gauzatzeko munduko ibilbide-orria abian jarri zuten.
Bizitzari baldintza duin eta justuetan eustearen aldeko apustua egiteko unea da: horrek begirada feminista eskatzen du erakundeetatik bultzatzen ditugun politika guztietan. Genero-desberdintasun estrukturalen gorakada errealitate ukaezina da: emakumeek beren gain hartzen jarraitzen dute zaintzen karga gehiena, ordaindua eta ordaindu gabea; eta azken honek gainera, prekarizazio norabidea nabarmen hartu du. Krisi egoera honi egoki erantzungo dioten erantzun integralak premiazkoak dira, esparru eta maila guztietan, globaletik tokikoraino eta alderantziz. Euskal Herrian, gure eskumen-esparru mugatuan, argi daukagu gure lurraldeetan gure bizitzaren burujabe ez garen bitartean ezin izango ditugula beharrezko aldaketa guztiak bultzatu: hala ere, badaude aukerak bide hori marrazten joateko, eta, hain zuzen ere, tokikoa da eremu egokiena.
Ibilitako azken 3 hamarkadetan aurrerapauso garrantzitsuak eman dira, baina bilakaera desorekatua izan da eta oraindik munduko herrialde bakar batek ere ez du lortu emakumeen eta gizonen arteko genero-berdintasuna. Hala eta guztiz ere, berdintasun-indizeek aurrerapena nabarmena izan dela erakusten dute, berdintasun-politiken araudi- eta erakunde-garapena eta mugimendu feministaren bultzada iraunkorra bateratu diren testuinguruetan.
30. urteurren horrek konpromisoak eta borondateak berritzeko aukera ematen digu, Beijingen adostutako berdintasunaren helburuak lortzeko, beharrezkoak diren baliabideak bideratuz, erronkei eta oraindik dirauten oztopoei aurre egiteko.
Euskal erakundeek eta, bereziki, tokiko gobernuek, 30 urte hauetan metatutako ebidentzia dute, eta horrek agenda feminista globalean oinarritutako berdintasun-politiken bermatu eta legitimatu egin du.
Berdintasun Politikek, azken urteetan, oinarrizko sistema bat sortu dute, baliabide eta planez josia. Ezinbestekoak izan dira, hainbat bide zabaltzeko, eta hauen garapenean oraindik bidea daukagu egiteko. Nabarmentzekoa da, indar ultrakontserbadoreek hauen kontra abiatu duten gurutzada, eta argi dugu horien defentsan eta sustapenean egongo garela instituzio bezala.
Elgoibarko Udalak genero-berdintasunaren lorpena bizkortzeko mundu-mugimenduarekin bat egin dugu, emakumeen eta nesken ahalduntzearen eta emakumeen eskubideen defentsaren aldeko apustua eginez. Tokiko eremutik arlo kritiko globaletan aurrera egiten laguntzeko, Elgoibarko Udalak ondorengo konpromisoak hartuko ditu:
- Berdintasun Sailak toki-elkarteei, oro har, eta, jakina, emakume-elkarteei eta elkarte feministei ematen dizkien dirulaguntzen zenbatekoak sendotzen jarraituko dugu, eta, horrela, oinarri sendoa sustatuko dugu emakumeek berdintasun-politika publikoetan parte-hartzeko eta eragina izateko.
- Arretarako eta koordinaziorako tokiko protokoloak eguneratuko ditugu, indarkeria matxistaren biktimei eta bizirik atera direnei erantzun egokia emango zaiela bermatzeko. Ahalegin hori erakundeen arteko koordinazio-protokolo berrian islatuko da.
- Bakardadeak identifikatu eta zaintza sistemari buruzko analisia egin teknikariekin eta inplikatutako eragileekin. Bertan jasotako ondorioei erantzuna emateko konpromisoarekin.
- Errenta baxuenak dituzten emakumeei ahalduntze ekonomikoa bermatuko dieten diru sarreren eskaera babestea eskumena duten erakundeen aurrean, eta konpentsazio neurriak aztertzea eta artikulatzea.
- Indarkeria matxistari aurre egin behar dieten emakumeei babesa eta laguntasuna, eta kasuz kasu egoerari aurre egiteko behar diren baliabideak (materialak, teknikoak…) ahalbidetzea.
- 4-Mugimendu Feministak herrian zein herrialdean bultzatuko duen dinamikarekin bat egitea eta Martxoaren 8ko deialdiak babestea, herrirarrei bertaratzeko deia eginez 5-Mugimendu Feministak bidezko eta berdintasunezko gizartea lortzeko egindako eta egiten duten ekarpena eta lana aitortzea
- Tokiko gobernuetan emakumeen eta gizonen berdintasunezko parte-hartzea eta eragina erraztuko duten baldintzak sortzeko akordioak egingo ditugu. Gainera, gizonentzako hausnarketa-saioak antolatuko ditugu genero-ikuspegiarekin, eta mutilekin landuko dugu berdintasunezko maskulinitatea eraikitzea.
- Udal Berdintasunerako V. Plana aurkeztuko dugu, eta Herritartasun Batzordean lortutako helburuen berri emango dugu aldizka, agenda feministaren eta berdintasun-politiken aurrerapenean gardentasuna eta etengabeko ebaluazioa bermatuz.